Preorder စနစ်ဖြင့်စရန်ငွေပေးသွင်းထားသည့် customer များအား စရန်ငွေပြန်ပေးရန် SWM Myanmar ကြေညာ

Auto Net Automobile News Agency
၁၁၊ နိုဝင်ဘာ၊ ၂၀၂၆
Yoma Motors က SKD စနစ်ဖြင့် ပြည်တွင်းဈေးကွက်မှာရောင်းချနေသည့် SWM ကားများကို preorder စနစ်ဖြင့်စရန်ငွေပေးသွင်းထားသည့် customer များအား စရန်ငွေပြန်ပေးအပ်မည်ဖြစ်ကြောင်း နိုဝင်ဘာ ၁၁ ရက်မှာ ကုမ္ပဏီကကြေညာလိုက်ပါတယ်။
လက်ရှိဖြစ်ပေါ်နေသည့်အခြေအနေများအရ မော်တော်ယာဉ်ထုတ်လုပ်ရန် အခက်အခဲများဖြစ်ပေါ်နေခြင်း၊ စရန်ငွေဖြင့်ဝယ်ယူထားသူများအား ကားအပ်နှံမည့်အချိန်တွင် ဈေးနှုန်းအပြောင်းအလဲများဖြစ်ပေါ်နိုင်သဖြင့် ယခုကဲ့သို့ စရန်ငွေပြန်လည်ပေးအပ်ရခြင်းဖြစ်ကြောင်း SWM Myanmar က ထုတ်ပြန်ချက်မှာဖော်ပြထားပါတယ်။
"ပြီးခဲ့တဲ့ရက်တွေကတည်းက စရန်ငွေပေးထားတဲ့ customer တွေကိုကျွန်တော်တို့ ဖုန်းဆက်အကြောင်းကြားထားတယ်" SWM Myanmar မှတာဝန်ရှိသူတစ်ဦးက auto Net ကိုပြောပါတယ်။
စရန်ငွေစနစ်ဖြင့်မှာယူထားသည့် customer များအနေဖြင့် ကုမ္ပဏီဘက်မှဆက်သွယ်လာမှုမရှိပါက စရန်ငွေပြန်လည်ထုတ်ယူနိုင်ရန်အတွက် Yangon Sales Hotline 09 7700 111 77 နှင့် Mandalay Sales Hotline 09 7700 777 27 တွေကိုဆက်သွယ်နိုင်သည့်အကြောင်း ကုမ္ပဏီကအသိပေးထားပါတယ်။
SWM Myanmar သည် တရုတ်နိုင်ငံထုတ် SWM G01F နှင့် SWM G01 Pro ကားများကို SKD စနစ်ဖြင့် တင်သွင်းထုတ်လုပ်ရောင်းချလျှက်ရှိသည်။
ဓါတ်ပုံ - YCC ခမ်းမတွင်ကျင်းပခဲ့သည့် ကားပြပွဲတစ်ခုတွင် SWM Myanmar မှ SWM G01 pro ကားတစ်စီးအားပြသထားသည့်ကိုတွေ့ရစဉ်