ပြည်တွင်းကားဈေးနှုန်းများ အမြင့်ပိုင်းတွင် ဆက်ရှိနေ

ပြည်တွင်းကားဈေးကွက်ထဲမှာ ဝယ်လိုအားနဲ့ ရောင်းလိုအား မမျှတဲ့ အခြေအနေတွေကြောင့် ဈေးနှုန်းတွေက အမြင့်ပိုင်းမှာပဲ ဆက်ရှိနေတယ်လို့ ကားဈေးကွက်အသိုင်းအဝိုင်းက သိရပါတယ်။ ကားဝယ်သူအများစုက ဂျပန်တစ်ပတ်ရစ်ကားတွေထက် Brand New ကားအသစ်တွေကို ပိုမို ရွေးချယ်လာကြပါတယ်။
SKD ကားအများစုကလည်း ဘဏ်နဲ့ချိတ်ပြီး ဝယ်ယူလို့ရတဲ့အတွက် Brand New ကားတွေက အရောင်းအဝယ် ပိုဖြစ်နေပြီး ကားဈေးကွက်မှာ ရင်းနှီးမြှုပ်နှံသူတွေ များလာကာ ရင်းနှီးမြှုပ်နှံသူတွေကလည်း Brand New ကားတွေကိုပဲ အများဆုံး ဝယ်ယူရင်းနှီးမြှုပ်နှံကြတယ်လို့ ဆိုပါတယ်။
လက်ရှိမှာ ပြည်ပကနေ လောင်စာဆီကား တင်သွင်းတာကို ရပ်ထားဆဲဖြစ်ပြီး EV ကားတွေကိုသာ တင်သွင်းခွင့် ပြုထားပါတယ်။ ပြည်တွင်းမှာ တစ်စိတ်တစ်ပိုင်း တပ်ဆင်ထုတ်လုပ်တဲ့ SKD ကား ကုမ္ပဏီတွေမှာလည်း ထုတ်လုပ်မှုအရေအတွက် နည်းနေတယ်လို့ သိရပါတယ်။
ဒါကြောင့် ဈေးကွက်ထဲမှာ ဝယ်လိုအားနဲ့ ရောင်းလိုအား အချိုးမမျှဖြစ်နေလို့ ကားဈေးနှုန်းတွေက အမြင့်ပိုင်းမှာပဲ ဆက်ရှိနေတာဖြစ်တယ်လို့ ဝါရင့်ကားဈေးကွက်ကျွမ်းကျင်သူတစ်ယောက်က သုံးသပ်ပြောကြားပါတယ်။ ပြည်တွင်းစက်ရုံတွေက ဈေးကွက်ထဲမှာလိုအပ်တဲ့ ကားအရေအတွက်ကို တောက်လျှောက်ထုတ်ပေးနိုင်မယ် ဆိုရင်တော့ ကားဈေးတွေက အလိုလို ပြန်လည်ကျဆင်းသွားနိုင်တယ်လို့ ဆိုပါတယ်။
ပြီးခဲ့တဲ့လတွေက လောင်စာဆီသုံး ကားတွေရော၊ EV ကားတွေပါ အရောင်းအဝယ်ကောင်းခဲ့ပြီး အခုရက်ပိုင်းမှာ တော့ အရောင်းအဝယ်ပုံမှန်သာ ရှိနေပါတယ်။ ကားဈေးကွက်ထဲမှာ ကျပ်သိန်း ၂၀၀၀ ဝန်းကျင်အောက် ကားတွေ အရောင်းအဝယ် ပိုဖြစ်ပြီး ဒီရက်ပိုင်းမှာတော့ ကားအမျိုးအစားအပေါ် မူတည်ကာ တချို့ကားတွေဆိုရင် အမြင့်ဆုံး ဈေးရဲ့ ကျပ်သိန်း ၁၀၀ ကနေ ကျပ်သိန်း ၁၅၀ ဝန်းကျင်လောက် ပြန်လည်ကျဆင်းလာတယ်လို့ သိရပါတယ်။
Credit to One News Myanmar