EV ကားများ၏ Range တိုင်းတာမှုစနစ်နှင့် လက်တွေ့မောင်းနှင်နိုင်မှု အကွာအဝေး

EV ကားတစ်စီး ဝယ်တော့မယ်ဆိုရင် ကြော်ငြာထဲမှာပါတဲ့ ကီလိုမီတာ (Range) ကိန်းဂဏန်းတစ်ခုတည်းကိုတင် ကြည့်လို့မရပါဘူး။ အဓိကက အဲဒီ Range ကို ဘယ်လိုစနစ် (Standard) နဲ့ တိုင်းတာထားသလဲဆိုတာကို သေချာကြည့်ဖို့ လိုပါတယ်။
လက်ရှိ EV ကားလောကမှာ မောင်းနှင်နိုင်တဲ့ အကွာအဝေး (Range) ကို တိုင်းတာတဲ့ စနစ် (၂) ခု အဓိက ရှိပါတယ် -
၁။ CLTC (China Standard) - တရုတ်နိုင်ငံသုံး စမ်းသပ်စနစ်ဖြစ်ပြီး ကားကို သက်သောင့်သက်သာ ရာသီဥတုနဲ့ အခြေအနေကောင်းတစ်ခုမှာပဲ အသာလေးမောင်းပြီး တိုင်းတာတာပါ။ ဒါကြောင့် ကြော်ငြာထဲမှာ ကီလိုမီတာ ပိုထွက်ပြီး လက်တွေ့ပြင်ပမှာ မောင်းနှင်ရတဲ့ အကွာအဝေးနဲ့ အတော်လေး ကွာခြားချက် ရှိပါတယ်။
၂။ WLTP (Europe Standard) - ဥရောပသုံး စမ်းသပ်စနစ်ဖြစ်ပြီး ပြင်ပမှာ တကယ်မောင်းနှင်ရမယ့် လမ်းကြောင်း၊ အရှိန်နဲ့ အခြေအနေမျိုးစုံကို ထည့်သွင်းစမ်းသပ်ထားတာဖြစ်လို့ လက်တွေ့ရရှိမယ့် Range နဲ့ အလွန်နီးစပ်မှု ရှိပါတယ်။
ဥပမာပြရရင် -
Deepal S07 (80kWh): CLTC စနစ်အရ 600 km ပြထားပေမဲ့ WLTP စနစ်မှာတော့ 475 km ပဲ ရှိပါတယ်။
Leapmotor B10: CLTC စနစ်အရ 600 km လို့ ပြောပေမဲ့ WLTP စနစ်မှာ 435 km သာ ထွက်ပါတယ်။
မြန်မာပြည်မှာ ရောင်းချနေတဲ့ တရုတ် EV ကားအများစုဟာ ကြော်ငြာရလွယ်ကူတဲ့ ကီလို ၆၀၀ ဆိုတဲ့ CLTC စနစ်ကိုပဲ သုံးကြပြီး၊ လက်တွေ့မောင်းနှင်ချိန်မှာတော့ ကီလို ၄၀၀ မှ ၅၀၀ ကြားပဲ ရကြတာများပါတယ်။
ဒီအထဲမှာမှ KIA EV3 လို ကားမျိုးကျတော့ WLTP စနစ်နဲ့ 605 km လို့ တရားဝင် ဖော်ပြထားတာပါ။ လက်တွေ့ မန္တလေး-ရန်ကုန် အမြန်လမ်းမပေါ်မှာ Speed 90-100 km/h နဲ့ မောင်းနှင်တဲ့အခါ 95% နဲ့တင် အရောက်မောင်းနိုင်ခဲ့ပြီး၊ Speed 100-120 km/h အထိ တင်းမောင်းရင်တောင် 110% (တစ်ခေါက်အားသွင်းရုံ) နဲ့ ရန်ကုန်-မန္တလေး အကွာအဝေးကို အသာလေး မောင်းနိုင်တာကို တွေ့ရပါတယ်။ ဒါဟာ WLTP စနစ်ရဲ့ ယုံကြည်စိတ်ချရမှုကို ပြသနေတာပါ။
ဒါကြောင့် EV ကားတစ်စီးဝယ်တော့မယ်ဆိုရင် ကြော်ငြာထဲက CLTC Range တစ်ခုတည်းကို မကြည့်ဘဲ၊ လက်တွေ့နဲ့ အနီးစပ်ဆုံးမှန်ကန်မယ့် အဆိုပါကားရဲ့ WLTP Range ကို သီးသန့် ပြန်လည်ရှာဖွေ လေ့လာကြည့်ဖို့ အကြံပြုချင်ပါတယ်။
by Ko Thiha