ဗီယက်နမ် EV ဈေးကွက်ထဲ Tesla ဝင်မယ်

အရှေ့တောင်အာရှမှာ တိုးတက်မှုအမြန်ဆုံး EV ကားဈေးကွက်ထဲ Tesla ဝင်တော့မှာပါ။
Tesla Motors Vietnam နာမည်နဲ့ ဒီလထဲမှာ ကုမ္ပဏီခွဲတစ်ခု မှတ်ပုံတင်ခဲ့ပြီးပြီ ဖြစ်လို့ ဗီယက်နမ်ဈေးကွက်ထဲ Tesla ပထမဆုံး ခြေချလိုက်ပြီလို့ ဆိုနိုင်ပါတယ်။ Tesla အတွက် ဗီယက်နမ်က စိန်ခေါ်မှုတွေ ၊ အခွင့်အလမ်းတွေနဲ့ ပြည့်နေတဲ့ ဈေးကွက်ပါ။
နိုင်ငံတကာ စွမ်းအင်အေဂျင်စီ IEA ရဲ့ အချက်အလက်အရ ၂၀၂၅ ခုနှစ်ထဲမှာ ဗီယက်နမ်ဟာ အရှေ့တောင်အာရှရဲ့ အကြီးဆုံး EV ဈေးကွက် ဖြစ်လာပြီလို့ ပြောထားပါတယ်။ ကားရောင်းအား နှစ်ဆ တက်လာပြီး EV က ကားသစ်ရောင်းအားရဲ့ ၄၀% နီးပါး ရှိလာလို့ပါ။
CounterPoint အစီရင်ခံစာတွေအရလည်း ဗီယက်နမ်ရဲ့ အခုနှစ် ဒုတိယသုံးလပတ် EV ရောင်းအားက နှစ်အလိုက် ၈၉% တက်လာပြီး ထပ်တက်လာဖို့လည်း ရှိတယ်လို့ ပြနေပါတယ်။ ဗီယက်နမ်နိုင်ငံက ဒီနှစ်ပိုင်း ပိုချမ်းသာလာနေတဲ့ နိုင်ငံပါ။
ကမ္ဘာ့ဘဏ် ထုတ်ပြန်ချက်ထဲမှာ ဗီယက်နမ်နိုင်ငံသားတွေရဲ့ တစ်ဦးချင်း GDP က အမေရိကန်ဒေါ်လာ ၅၀၆၆ အထိ ရောက်လာပြီလို့ ဆိုပါတယ်။ ဝင်ငွေမြင့်လာတဲ့နိုင်ငံမှာ တန်ဖိုးမြင့်တဲ့ ကားတွေ ဝယ်စားနိုင်လာတာ အဆန်းတော့ မဟုတ်ပါဘူး။
စိန်ခေါ်မှုကတော့ Tesla ရင်ဆိုင်ရမယ့် ပြိုင်ဘက်က ထောင်တက်လာနေတဲ့ ဗီယက်နမ်ပြည်တွင်းကုမ္ပဏီ VinFast ပါ။ Vingroup ပိုင် VinFast က ဗီယက်နမ် EV ဈေးကွက်ရဲ့ ၉၂% ကို ကြီးစိုးနေသလို အားသွင်းစနစ်ပေါင်း ၁ သိန်းခွဲကျော် ၊ after-sales service ကွန်ရက် နဲ့ mobility ecosystem တစ်ခုလုံး ခြေကုပ်မြဲပြီး ဖြစ်နေပါတယ်။
Vingroup ရဲ့ အခုနှစ် ပထမနှစ်ဝက် ဝင်ငွေတင် ဗီယက်နမ်ဒေါင် ၂၂၁.၉၇ ထရီလီယံ (အမေရိကန်ဒေါ်လာ ၈.၅၂ ဘီလီယံ) ရှိတာ ဖြစ်လို့ ဘဏ္ဍာရေးအင်အားလည်း တောင့်တင်းပြီးသားပါ။ VinFast က အခုနှစ် ၈ လအတွင်း ဗီယက်နမ်မှာ ကားအစီးရေ ၁၅၄၀၀၀ ကျော် ရောင်းပြီးလို့ ၂၄ လ ဆက်တိုက် အရောင်းရဆုံး ကားကုမ္ပဏီ ဖြစ်နေပါတယ်။
VinFast အသားစီးရနေတဲ့ ဈေးကွက်မှာ Tesla ရဲ့ ပရီမီယံ တန်းမြင့် EV ကားတွေ ဈေးကွက်ဖောက်နိုင်ရင်တောင် ဝင်တိုးရခက်မှာပါ။
Credit to Duwun Tech