၁၉၉၇ မိုဒယ်ကနေ ၂၀၀၁ မိုဒယ်အထိ မော်တော်ယာဉ် ၆၃ စီးအားယာဉ်အိုယာဉ်ဟောင်းအပ်နှံပြီး လျှပ်စစ်ဘတ်စ်ကားများအစားထိုးရန်ညွှန်ကြား

Auto Net Automobile News Agency
သတင်း ။ ။ အသောင်း
ရန်ကုန်တိုင်းဒေသကြီး သယ်ယူပို့ဆောင်ရေးကြီးကြပ်မှုကော်မတီ (YRTC) ကြီးကြပ်မှုအောက်မှာရှိတဲ့ YBS အများပိုင်ကုမ္ပဏီတွေက စီမံကြီးကြပ်နေတဲ့ ဘတ်စ်ကားတွေထဲကမှာ၁၉၉၇ မိုဒယ်ကနေ ၂၀၀၁ မိုဒယ်အထိ မော်တော်ယာဉ် ၆၃ စီးအားယာဉ်အိုယာဉ်ဟောင်းအပ်နှံပြီး လျှပ်စစ်ဘတ်စ်ကားများအစားထိုးရန်ညွှန်ကြားလိုက်တယ်လို့ သိရပါတယ်။
နိုင်ငံတော်သမ္မတရုံးညွှန်ကြားချက်ကြောင့် ရန်ကုန်တိုင်းဒေသကြီးအစိုးရအဖွဲ့က YRTC ကိုညွှန်ကြားလာတဲ့အတွက် အများပိုင်ကုမ္ပဏီ ၂၁ ခုရှိတဲ့အနက် ကုမ္ပဏီ ၁၀ ခုမှာရှိတဲ့ ဘတ်စ်ကား ၆၃ စီးကို ယာဉ်အိုယာဉ်ဟောင်းအပ်နှံရေးဆောင်ရွက်ရတာဖြစ်တယ်လို့ သိရပါတယ်။
"ဒီကုမ္ပဏီဆယ်ခုမှာရှိတဲ့ကားတွေက ၂၀၀၁ မိုဒယ်အောက်ကားတွေဖြစ်နေလို့ ဒီဆယ်ခုကိုပဲအကြောင်းကြားလာတဲ့သဘောပါ။ တခြားကုမ္ပဏီတွေက ၂၀၀၁ မိုဒယ်အထက်ကားတွေဖြစ်နေလို့ လိပ်မူပြီးအကြောင်းမကြားတာလည်းဖြစ်နိုင်ပါတယ်။ အခုအချိန်က ကားတွေလိုအပ်ချက်ကြီးနေတော့ ကောင်းတော့လည်းကောင်းတယ်။ မကောင်းဘူးလို့လည်းပြောလို့ရတယ်။ ဘာလို့လည်းဆိုတော့ YBS မှာကားလိုအပ်ချက်ကြီးနေတယ်လေ" လို့ YBS ယာဉ်လိုင်းကုမ္ပဏီ တာဝန်ရှိသူတစ်ဦးက Auto Net ကိုပြောပါတယ်။
ညွှန်ကြားချက်မှာပါနေတဲ့ ဘတ်စ်ကား ၆၃ စီးရဲ့ ယာဉ်လိုင်းပြေးဆွဲမှုအခြေအနေ၊ ယာဉ်လိုင်းပြေးဆွဲမှု ရှိ၊မရှိအခြေအနေနှင့် မြေစိုက်လို့ခေါ်တဲ့ ပြေးဆွဲမောင်းနှင်လို့ရ၊ မရ အခြေအနေတွေကို ကုမ္ပဏီတွေအလိုက်စာရင်းပြုစုပြီး စက်တင်ဘာ (၁၄) ရက်နောက်ဆုံးထားတင်ပြရမယ်လို့ ထုတ်ပြန်ချက်မှာဖော်ပြထားပါတယ်။
ရန်ကုန်တိုင်းဒေသကြီး အများပြည်သူသယ်ယူပို့ဆောင်ရေးအတွက် YBS ယာဉ်လိုင်းတွေမှာ ဘတ်စ်ကားလိုအပ်ချက်တွေရှိနေတာကြောင့် ဘတ်စ်ကားအသစ်တွေတင်သွင်းဖို့ အစီအစဉ်ရှိ၊မရှိအဆိုကို ပြီးခဲ့တဲ့လက ရန်ကုန်တိုင်းဒေသကြီးလွှတ်တော်ပုံမှန်အစည်းအဝေးမှာ မေးမြန်းခဲ့ရာမှာတော့ တင်သွင်းရမယ့်လျှပ်စစ်ဘတ်စ်ကားတွေရဲ့တန်ဖိုးဟာ အဆမတန်မြင့်မားနေတာကြောင့် တင်သွင်းဖို့အစီအစဉ်မရှိဘူးတို့ တိုင်းဒေသကြီး နယ်စပ်ရေးနှင့်လုံခြုံရေးရာဝန်ကြီး ဗိုလ်မှူးကြီးဝင်းတင့်က ပြောဆိုထားပါတယ်။
ယခုအစားထိုးတင်သွင်းမယ့် လျှပ်စစ်ဘတ်စ်ကားတွေဟာ အာဆီယံဒေသတွင်းနိုင်ငံတစ်ခုကနေထုတ်လုပ်တဲ့ ၁၂ မီတာအရှည် လျှပ်စစ်ဘတ်စ်ကားတွေဖြစ်နိုင်တယ်လို့လည်း သတင်းတွေထွက်နေပါတယ်။
By 𝐀𝐮𝐭𝐨 𝐍𝐞𝐭