ကားဟောင်းအပ်ပြီး ကားသစ်လဲရင် ဘတ် ၄၀,၀၀၀ ထောက်ပံ့မယ့် အစီအစဉ်ကို ထိုင်းနိုင်ငံ စတင်ဖော်ဆောင်နေ

ထိုင်းနိုင်ငံရဲ့ အခွန်ဌာနဟာ PM2.5 လေထုညစ်ညမ်းမှုကို လျှော့ချဖို့နဲ့ ပြည်တွင်းမော်တော်ယာဉ်ဈေးကွက်ကို ပြန်လည်ဦးမော့လာစေဖို့ ရည်ရွယ်ပြီး ပစ်ကပ်ကားလဲလှယ်ရေး အစီအစဉ် တစ်ခုအတွက် ဘတ် ၆ ဘီလီယံ တောင်းခံထားပါတယ်။ အဲဒီအစီအစဉ်အရ အသက် ၂၀ နဲ့အထက် ထိုင်းနိုင်ငံသားတွေဟာ ၂၀၁၂ ခုနှစ်မတိုင်မီက မှတ်ပုံတင်ထားတဲ့ ကားဟောင်းတွေကို အပ်နှံပြီး လူ ၁ ဦးချင်းစီအတွက် ဘတ် ၄၀,၀၀၀ ထောက်ပံ့ငွေကို အသစ်ဝယ်ယူတဲ့နေရာမှာ လျှော့ငွေအနေနဲ့ ရရှိမှာ ဖြစ်ပါတယ်။
လဲလှယ်မယ့်ကားဟောင်းတွေဟာ နှစ်စဉ်အခွန်ပေးဆောင်ထားပြီး ခိုင်မာတဲ့ ကိုယ်ထည်နံပါတ်တွေ ရှိရမှာဖြစ်ပြီး ဘဏ္ဍာရေးစာချုပ်တွေ ဒါမှမဟုတ် တရားဝင်ဖ-မ်းဆီးထားမှုတွေ မရှိရပါဘူး။ အဲဒီလို အစားထိုးဝယ်ယူမယ့် မော်တော်ယာဉ်သစ်တွေဟာ ထိုင်းနိုင်ငံမှာ ထုတ်လုပ်ထားတာ ဖြစ်ရမယ့်အပြင် Euro 5 သို့မဟုတ် Euro 6 စံချိန်စံညွှန်းတွေ၊ တစ်ကီလိုမီတာကို ကာဗွန်ဒိုင်အောက်ဆိုဒ် ၁၈၅ ဂရမ်ထက်မပိုတာနဲ့ လျှပ်စစ်ကား နည်းပညာစံသတ်မှတ်ချက်တွေနဲ့ ကိုက်ညီရမှာ ဖြစ်ပါတယ်။
အဲဒီအစီအစဉ်မှာ ပါဝင်တဲ့ လျှပ်စစ်ပစ်ကပ်ကား ဝယ်ယူသူတွေအတွက် အစိုးရစုဆောင်းငွေဘဏ်ရဲ့ အတိုးနှုန်းသက်သာတဲ့ ချေးငွေအစီအစဉ်နဲ့ တစ်နှစ်လျှင် အတိုးနှုန်း ၅ ရာခိုင်နှုန်းနဲ့ ချေးငွေလျှောက်ထားနိုင်ပါတယ်။ နိုင်ငံတစ်ဝန်းက အသက် ၁၀ နှစ်နဲ့အထက် ယာဉ်ဟောင်း ၈ ဒသမ ၁၈ သန်းကျော် ရှိနေတဲ့အထဲက မော်တော်ယာဉ် ၁၅၀,၀၀၀ ကို အသစ်လဲလှယ်နိုင်ဖို့ ရည်မှန်းထားပြီး အဲဒီအစီအစဉ်ဟာ နှစ်စဉ် ဖန်လုံအိမ်ဓာတ်ငွေ့တွေကို တန်ချိန် ၃၁၀,၀၀၀ ကျော် လျှော့ချပေးနိုင်မယ်လို့ ခန့်မှန်းထားပါတယ်။
ဒါပေမဲ့ အဲဒီအစီအစဉ် အကောင်အထည်ဖော်ရာမှာ ထိုင်းနိုင်ငံရဲ့ အသိအမှတ်ပြု ကားဖျက်သိမ်းရေး လုပ်ငန်းတွေအနေနဲ့ တစ်နှစ်ကို ယာဉ်အစီးရေ ၅၀,၀၀၀ လောက်သာ လုပ်ဆောင်နိုင်သေးတာကြောင့် စိန်ခေါ်မှုတွေ ရှိနေပါတယ်။ ကားအဟောင်းအပ်ပြီး ကားအသစ်လဲပေးမယ့် အချိန်ဇယားကို ၂၀၂၇ ခုနှစ် ဇန်နဝါရီလမှာ စတင်ဖို့ ရည်မှန်းထားပေမဲ့ အစီအစဉ် မစတင်ခင်မှာ ဘတ် ၆ ဘီလီယံ ရန်ပုံငွေတောင်းခံမှုကို အတည်ပြုချက် ရယူရဦးမှာ ဖြစ်ပါတယ်။
DISCLAIMER : No copyright infringement intended. I do not own the images. All rights reserved to , the original owners and entertainments.
Ref : Thethaiger
credit