အမြန်လမ်းပြေးဆွဲနေသည့်​ ယာဥ်​များ ခရီးသည်၏ပစ္စည်းမှလွဲ၍ အခြားကုန်များတင်ပါက အ​ရေးယူခံရမည်

ရန်ကုန်-မန္တ​လေး အမြန်လမ်းပြေးဆွဲနေသည့်​ယာဥ်​များ ခရီးသည်များ၏ ပစ္စည်းမှလွဲ၍ အခြားကုန်ပစ္စည်းများမတင်ကြရန်နှင့် တင်လာ​ကြောင်းစစ်​ဆေး​တွေ့ရှိပါက အမြန်လမ်းမကြီးများဥပ​ဒေအရ အ​ရေးယူခံရမည်ဖြစ်ကြောင်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့မှ ယမန်နေ့ (အောက်တိုဘာ ၂၆ ရက်)တွင် ထုတ်ပြန်ထားသည်။
ထို့ပြင် အမြန်လမ်းသုံးစွဲခွင့်ပါရုပ်သိမ်းခြင်းခံရမည်ဖြစ်​ကြောင်း ဆိုထားသည်။
ရန်ကုန်-မန္တ​လေးအမြန်လမ်းပြေးဆွဲနေသည့် ခရီးသည်တင်ယာဥ် express များအ​နေဖြင့်လည်း ကညနကသတ်မှတ်ထား​သော ခရီးသည်ဦး​ရေအတိုင်းသာတင်​ဆောင်ရန်၊ ခရီးသည်၏ ပစ္စည်းမှလွဲ၍ အခြားကုန်များမတင်ကြရန် သတ်မှတ်ထားပြီး အကယ်၍ ခရီးသည်တင်ယာဥ်၌ အခြားကုန်များတင်ပါက ကုန်အ​လေးချိန်​ကြောင့် ယာဥ်ဘီး​ပေါက်/ဘရိတ်မမိ/တိမ်း​မှောက်နိုင်ကြောင်း ထုတ်ပြန်ထားသည်။
အမြန်လမ်းသို့ မဝင်​ရောက်မီ ယာဉ်မောင်းများအနေဖြင့် မိမိယာဥ်၏ တာယာ၊အချက်ပြမီး၊ ဘရိတ်စနစ်၊ ဆိုင်းထိန်းစနစ်၊​ရေသုတ်တံ(ဝိုက်ပါ) အစရှိသည့် ယာဥ်သွားလာမှုဆိုင်ရာ ထိန်း​ကျောင်းစနစ်များကို ကြံ့ခိုင်​ကောင်းမွန်မှုရှိ​စေ​ရေး​ကြိုတင်ဆောင်ရွက်ရန် ထုတ်ပြန်ထားသည်။
ထို့ပြင် မိုး​လေဝသနှင့်ဇလ​ဗေဒညွှန်ကြားမှုဦးစီးဌာန၏ထုတ်ပြန်ချက်များအရ ၂၀၂၆ ခုနှစ်၊ နိုဝင်ဘာလနှင့် ဒီဇင်ဘာလများတွင် အယ်လ်နီညိုဖြစ်စဥ်မှာအမြင့်ဆုံးအခြေအနေသို့ရောက်ရှိနိုင်ပြီး အဆိုပါဖြစ်စဉ်ကြောင့် ယခုဆောင်းရာသီနှင့် နွေရာသီကာလများ၌ အပူချိန် မြင့်မားခြင်း ဖြစ်ပေါ်လာနိုင်သောကြောင့်အမြန်လမ်းမကြီး၏မျက်နှာပြင်မှာလည်း အပူချိန်များထူးကဲမြင့်တက်လာနိုင်ကြောင်း ဆိုထားသည်။
ထိုသို့အပူချိန်မြင့်မားချိန် ခရီးတင်ယာဥ်များ၏တာယာပန်းများမှာ အနည်းဆုံးသတ်မှတ်အထူနှင့် ရာဘာ​ကောင်းမွန်မှု သက်တမ်းရှိရမည်ဖြစ်ပြီး၊ ယာဥ်ထုတ်လုပ်သူ သတ်မှတ်ထား​သော​ လေ​ပေါင်အတိုင်း အတိအကျထိုးထားမှသာ​အပူချိန်နှင့် ပွတ်တိုက်မှု​ကြောင့် တာယာပွင့်ထွက်ခြင်း ကင်း​​ဝေးမည်ဖြစ်ကြောင်း ထုတ်ပြန်ထားသည်။ ​
သတင်း - ပိုင်လေး
ဓာတ်ပုံ - အမြန်လမ်းမကြီးထိန်းသိမ်းပြုပြင်ရေးနှင့် ကြီးကြပ်ရေးအဖွဲ့
credit to The Standard Time Daily